ភ្នំពេញ៖ នាយករដ្ឋមន្ត្រី សម្ដេចធិបតី ហ៊ុន ម៉ាណែត បានសម្រេចដកការអនុវត្តយកពន្ធលើដីដែលនៅក្រៅតំបន់ជាប់ពន្ធរហូតដល់ ៥ហិតា បានន័យថាដីដែលមានទំហំចាប់ពី ៥ហិតាចុះក្រោមដែលនៅក្រៅតំបន់ជាប់ពន្ធនឹងមិនមែនជាកម្មវត្ថុនៃការយកពន្ធនោះទេ។

ថ្លែងក្នុងវេទិការដ្ឋាភិបាល និងវិស័យឯកជនលើកទី១៩ នៅវិមានសន្ដិភាព ព្រឹកថ្ងៃច័ន្ទ ទី១៣ ខែវិច្ឆិកា ឆ្នាំ២០២៣ នេះ សម្ដេចធិបតី ហ៊ុន ម៉ាណែត ថាការធ្វើបែបនេះគឺដើម្បីបញ្ជៀសការយកពន្ធត្រួតគ្នា និងមិនឱ្យប៉ះពាល់ដល់ប្រជាជនទូទៅ ដែលការអនុវត្តនេះនឹងចាប់ផ្ដើមនៅឆ្នាំ២០២៥ តទៅ។

ចំពោះដីដែលលើសពី ៥ហិតាអាចរួចពន្ធដីធ្លីមិនប្រើប្រាស់បានក្រោមហេតុផលដីកសិកម្មដែលមានការបញ្ជាក់ពីគណៈកម្មការវាយតម្លៃដីសម្រាប់ពន្ធលើដីធ្លីមិនប្រើប្រាស់ ដីដែលកំពុងបម្រើសកម្មភាពសេដ្ឋកិច្ច ដីដែលមានសំណង់ ឬគ្មានសំណង់ស្ថិតក្រោមកិច្ចសន្យាជួល ដីដែលជាកម្មសិទ្ធិរបស់រដ្ឋ និងសហគមន៍ ដីដែលស្ថិតក្នុងតំបន់សេដ្ឋកិច្ចពិសេសបម្រើការដល់សកម្មភាពកសិកម្ម ឧស្សាហកម្ម និងសេវាកម្ម៕